Li parêzgehên Wan, Mûş û Bedlîsê ji ber berfa zêda rêya 190 gund û gundikan hat girtin.

Li piraniya parêzgehên Bakurê Kurdistanê barîna berfê berdewam e.

Li gor daxuyaniya Şaredariya Bajarê Mezin ê Wanê ji ber berf û pûkê rêya 27 gund û gundikên bajêr hatine girtin û tîmên berpirsiyar bo vekirina rêyan kar û xebatên xwe berdewam dikin.

Herwiha li parêzgeha Mûşê rêya 113 gund û gundikan û li Bedlîsê jî rêya 50 gundan ji ber barîna zêde a berfê hatine girtin.

Îdareya Taybet a her du bajaran ragihandiye ku hem li gundan û hem jî li navendê kar û xebatên vekirina rê berdewam in.

Li Bakurê Kurdistanê, heta niha ji ber berf û pûkê rêya zêdeyî 2000 gund û cihên niştecihbûnê hatiye girtin.

Her çiqas tîmên peywendîdar rêyan paqij dikin jî, lê ji ber bênavber barîna berfê rê dîsan tên girtin.